ملامح من عام 2500

يجلس الاب في الصالون في طاولة الكتشينة الالكترونية وحوله على الكراسي يجلس اشباح ناس يلعبون مع بعض كتشينة حريقة بنفس فكرتها الموروثة القديمة ويعلوا صوتهم في الصالون ...
في المطبخ صوت الام تصرخ مع اطفالها وهي تعد لهم الوجبات اليومية للمدرسة ..
الاب صرخ : الجوطة شنو يا احسان مالك مع الاولاد ..
الام :: دا ولدك معتز دا قال الاوكسجين عايزه بنكهة الفراولة ما عايز نكهة الفانيليا ..
الاب : ماتعملي ليه الاكسجين العايزه ..
الام :: لكن امس عبينا ليه اسطوانة الاكسجين بنكهة الفراولة والمعلمه قالت لازم ننوع ليهم الاكسجين
الاب : المهم حلي الموضوع دا وما تدوشونا
في هذه اللحظة تسمع صوت صرخة احد اعضاء الكتشينة بصوت عالي ( مليييييييييار) ( في زمننا كانت خمسين ) ويضج الحضور بالضحك مما يصيب ابو حسام بالغيظ ويتناول الرموت مقررا ان يلغي اصدقائه ..
يبدا احدهم ::: عيب عيب عيب يا ابو حسام بطل الجرسة ماتطفينا خلي روحك رياضية ..
ابو حسام : روحي رياضية يا جبنا خليتوني انشغلت مع الوليه وسرقتوا الورق
احد الزملاء : عيب الكلام دا يا ابوحسام ... وتقدر تعمل رننق للسيستم .. وانت عارف انا في استراليا وهاشم في شيلي ومختار في انجلترا .. بنلعب مع بعض عن طريق جهاز الانترفون ... وكيف راح نسرقك .. بس ارجوك ماتطفي الجهاز ..
ابو حسام :: لا انا ما عشان جريتوني ... اصلوا انا عندي اجتماع بعد نص ساعة في اليابان والركشة الطايره بتاعتي في المغسلة
يرن جهاز الاتصال ويظهر صورة في السقف لولد شاب يتحدث مع امه ...
صباخ الخير ياماما
الام : اهلا حبيبي حسام عامل كيف مع الجامعة .. استراليا حاره ولا بارده الليلة ..
حسام : انا كويس ياماما بس عاوز مصاريف الفطور
ام حسام : خلاص يا حبيبي نكلم ابوك يغشيك ليها في استراليا وهو ماشي اليابان ..
ام حسام تمر الصالون لزوجها :: ابو حسام عليك الله وانت في طريقك لليابان اغشى معاك حسام في استراليا واديه حق الفطور .
ابو حسام متنرفزا : يا وليه انت الاولاد ديل خارباهم ... هو الولد ما يركب الدباب الجوي بتاعه يشيل قروش الفطور ويرجع هي كلها ربع ساعة .. ما هي دي اخته سحر بتقرا في جامعة المشترى وكل يوم خميس بتبيت معانا في البيت ... وهو الولد بدل ما يدخل اي كليه من الكواكب البعيده انت اصريتي انه يدخل جامعة معانا هنا في الارض عشان يكون قريب منك .. وهنا انت عارفه القرايه متخلفة .. تصوري يا دوب بيدرسوا تركيب المفاعل النووي .. زي الاطفال يخصي على دا علم متخلف ..
ام حسام :: ما تتريق على العلم عشان انت خريج جامعة الزهرة للبروتون بتتريق على علم الارض ... تتخيل قالوا زمان انه العلم كان مصدره الارض قبل ما يهاجر بعض اجدادنا للكواكب التانية ويعمروها ....
ابو حسام ::: ذكرتيني الليلة في مباره مهمة في كاس الكون للانديه بين مريخ الارض ومريخ المريخ في نهائي الكاس ..
ام حسام : بالصحي انت يا ابو حسام صحي العجب السادس عشر كابتن المريخ دا جده كان العجب الاول برضه كابتن المريخ ...
ابو حسام :: زي السمعت كدا يا احسان خلي نشوفها في نظارة المعلومات .
في غرفة ثانية تجلس الجده حولها الاطفال الصغار وتحكي لهم الذكريات وتحجيهم كما كان يقال ....
بعد ان تقف الجده وتعدل بنطلون الجنز وتجلس على الكرسي الهزاز وحولها الصغار هيثم وسناء ورغد
هيثم :: صحيح يا حبوبة اجدادنا زمان كانوا بيستعملوا حاجة اسمها الانترنت ؟؟؟؟؟
الجده :: ودي سمعتها وين يا شقي اذا كان انا ما حاضراها .
سناء ::: والانترنت دا شنو يا تيتة.
الجده ::: قالوا اجدادنا زمان كان عندهم اجهزة كده متخلفة يعني قدر عقولهم اها اسمها الكمبيوتر .. والكمبيوتر دا عامل زي شنو عامل زي شنو يا هييييام .. انا ذاتي حبوبتي كانت وصفته لي ... والمهم صندوق كدا فيه شاشة قزاز ... الزمن داك شاشات البخار لسع ما اكتشفوها خليكم من شاشات الاشعة الفوق البنفسجبة . الظهرت قبل ماية سنة ديك ... وتتخبلوا حاجة اظرف من كدا حكاها لي جدي قال ان رغما عن اجهزة الكمبيوتر ديك كانت اجهزة بسيطة ومتخلفة الا انه معظم الناس كانوا ما بيعرفوا يستعملوها ...
تخيلوا زمان اذا كنت انت في السودان عاوز تتحدث مع واحد في امريكا القريبة دي اها تمشي وتقعد قدام الكمبيوتر وتجلس بالساعات عشان تكتب رساله وتتفاهم معاه ..
رغد : يعني يا تيته اجدادنا زمان كانوا مساكين وغلبانين ..
يقطع حديثهم ظهور حسام وهو يتحدث :::
حبوبة كيفك وين ماما
الجدة : امك دي راحتلها عزا في كندا وجايه بعد شويه
حسام :خير المات منو
الجده : قالوا واحده صاحبتها كانت قرت معاها زمان في مدرسة القمر الثانوية
حسام : خلاص يا جده قولي ليها اصحابي جايين معاي للغدا وتعمل حساب وجبة لثلاث اشخاص ...
الجده :: عبي المواصفات في جهاز البث بتاعك ورسلها للمايكرويف يجهز ليكم الغدا وانت عاوز امك لشنو
حسام : ياجده بس عشان تكون عارفة يعني